Golden Star i tekem niu daereksen

Oli gat evri kwaliti blong ol futbol star, be oli no soem komitmen mo dedikesen.
Hemia i wan long ol plande komen we plande long-taem fan blong futblol long Port Vila i talem abaot ol pleya blong Erakor Golden Star FC.
Ol `Golden Boys' i nid blong rifresem memori blong olketa long histori blong hom tim blong olketa bifo oli disaid blong werem Gold & Black kala blong olketa mo go insaid long fil. Golden Star or Etoile d'Or, i wan long ol fes indijines tim long wan taem we ol forena nomo i plei futbol long New Hebrides bifo.
Ol plande yia we i pas kasem tede, majoriti blong ol pleya insaid long tim ia i blong Erakor vilej nomo. Sistem ia i bin stat bifo i kam, be i luk olsem ol niu jenaresen i mestem standed blong tim bigwan.
Las yia, ni-Vanuatu bisinesman Andrew Leong i aot long posisen blong wan sponsa blong Golden Star mo hem i kam Presiden blong klab ia. Afta perfomans blong tim long las yia, Andrew i disaid blong jenisem fomesen blong tim we bambae i lukim se tradisenal sistem ia blong ol pleya i kamaot nomo long vilej bambae i stop, mo ol niufala pleya (we i no man Erakor) i go insaid long tim.
"Mi wantem jenisem mentaliti blong ol pleya insaid long tim from ol yangfala ia i nomoa respektem tim blong olketa olsem ol olfala blong olketa bifo. Mi wantem tekem ol aotsaid pleya i kam insaid blong mekem se ol orijenal pleya i save tren had blong winim posisen blong olketa long tim", Andrew i talem.
Executive memba mo foma pleya blong Golden Star Louis Carlot i agri wetem niufala daereksen we Andrew i tekem.
"Hemia i gud tumas ia from i had tumas blong kontrolem ol boe. Long wan wik bambae wan i plei mo long nekis wik blong hem bambae hem i no kam long trening wetem tingting se hem i givim janis long nara fren blong hem blong hem i plei... samting ia i mekem se oli no siries nating long trening mo diseplin. Naoia bambae oli mas fait blong stap insaid long tim... hemia i gud blong ol pleya mo i gud blong tim", Carlot i poenemaot.
Tresara blong Golden Star Robatiti Lauru i talem se Isaac Kabi i stap long list blong olketa finis wetem ol nara pleya bakeken olsem Manu Peter, mo wan moa we bambae i kamaot long Santo. Hem i talem se i tru Cahrlie Ligo i bin askem hemwan blong joinem tim long yia ia, be oli nomoa harem eni toktok long hem. Olsem pat blong leftemap futbol long Erakor, Andrew i stat finis blong putum lait long fil blong vilej ia. Hem i talem se taem ol wok i finis bambae ol nara klab blong PVFL i save go yusum ol fasiliti blong olketa blong oganaesem ol tunamen.


Comments

Comment Guidelines: The SportsTG Network is made up of players, families and passionate sports followers like you who have a strong opinion about sport. That's great - we want you to have your say and share your thoughts with the world. However, we have a few rules that you must follow to keep it fun for all. Please don't be rude, abusive, swear or vilify others. Apart from some pretty serious sport sanctions, we also can ban you and report you if things get out of hand. So play fair and have fun, and thanks for your contribution.